Gagnrýni Silju Aðalsteinsdóttur:

Baneitrað samband í Silfurtunglinu

 

Hún er eins og þéttur og flottur nútímadans - dansleikhús af magnaðri gerðinni - sýning Silfurtunglsins í Austurbæ á Fool for Love eftir Sam Shephard undir stjórn Jóns Gunnars Þórðarsonar. Þar takast þau á, ýmist í hægum valsi mettuðum hatri eða trylltum erótískum áflogum Þóra Karítas Árnadóttir og Sveinn Ólafur Gunnarsson. Ekki voru síður átakamikil danssporin sem þeir tóku vonbiðlar stúlkunnar, Sveinn Ólafur og Magnús Guðmundsson þegar hún lét þá eina á sviðinu. Manni varð ekki um sel.

Fool for Love fjallar um ást sem tortímir, brennir hlutaðeigandi upp í trylltri, banvænni ástríðu. Í leikskrá segir að verkið hafi sprottið beint upp úr þeim aðstæðum höfundar þegar hann yfirgaf konu og börn fyrir leikkonuna Jessicu Lange sem hann kynntist við tökur á kvikmyndinni Frances sem þau léku bæði í (1982). Í leikritinu er Eddie (Sveinn Ólafur) áhættuleikari í kvikmyndum og greinilegt er að (fyrrverandi? núverandi?) ástkona hans May (Þóra Karítas) hefur hann meira en grunaðan um að halda við kvikmyndastjörnu - sem hún nefnir hæðnislega "prímadonnuna". Það er yfirborðsástæðan fyrir átökum þeirra þegar hann kemur og vill fá hana í sambúð aftur í húsvagninum sínum. May hefur komið sér fyrir í herbergi í niðurníddu móteli í einhverju rassgati og fengið vinnu meðan hann var í burtu, hún er meira að segja komin með deit, sakleysingjann Martin (Magnús Guðmundsson).

"Ég kveið að þú færir, ég kveið að þú yrðir um kyrrt," syngur KK sem leikur Gamla karlinn, og það er vandi May í hnotskurn. En brotthvörf og framhjáhöld Eddies eru ekki undirrót vandans, á það minnir sá gamli okkur við og við, milli þess sem leikarinn syngur eigin lög og texta um ástir og örlög persónanna. Orsökin liggur í fortíðinni...

Sveinn Ólafur er sérlega glæsilegur á sviði, hávaxinn og flottur, og sniðinn fyrir hlutverk Eddies að öllu leyti. Hlutverk May er margslungnara - konur eru greinilega flóknari en karlar í vitund Sams Shepard - og Þóra vinnur hér stóran leiksigur. Ekki er hún aðeins eins og sköpuð í hlutverkið líkamlega, lítil og falleg og flottur kroppur - og einkar vel valin á móti longintesinum Sveini - heldur ræður hún vel við þær andstæðu tilfinningar og harkalegu sveiflur sem geð May tekur þessa kvöldstund sem við fáum að fylgjast með elskendunum. Magnúsar hlutverk var minna en hinna, en eins og áður gat eru áflog þeirra karlmannanna æðisleg.

Hér eru nýliðar í mörgum hlutverkum, bæði á sviði og utan sviðs, en það er ekki að sjá á faglegum og blæbrigðaríkum tökum þeirra á þessu vel skrifaða verki (byggt er á þýðingu Gísla Ragnarssonar). Vonandi er Silfurtunglið komið til að vera.

 

Silja Aðalsteinsdóttir, Tímarit Máls og Menningar.

FOOL FOR LOVE

   

Gagnrýnendur eru á einu máli

”Fátt sem geislar jafnmikilli ástríðu á sviði núna”

 ”Sveinn Ólafur Gunnarsson er trúverðurgur Eddie.  Hann hefur hljómmikla og sterka rödd.. .

”Þóra Karítas er innblásin í leik sínum í gegnum allt verkið og sýnir fína svörun við Eddie”.

 ” Magnús Guðmundsson sýnir frábæran leik sem Martin”. 

”  KK kemur fyrir sem reyndur atvinnumaðu á þessu sviði”         

Martin Regal, Morgunblaðið 29. janúar 2007 

**** 

Gaman í leikhúsi þegar hlutirnar ganga upp. 

Sýning sem gleður, hræðir, skelfir og hrífur sökum þess að hún er heilsteypt flott listarverk þar sem lögn leikstjórans er svo skýr að ekkert verður að vafamáli. 

Stúlkuna túlkar Þóra Karítas með mikilli nánd og styrk. 

 Samspil leikaranna er frábært. 

KK rammaði sýninguna inn, var límið, var ryþminn, var lagið sem menn dilluðu sér við, var umgjörðin var hættan, var vonin og var fulltrúi þeirra og sársauka sem myndaði verkið.  KK var kórinn og jafnframt hinn vonlausi faðir.  Hann var ásinn sem tilveran snérist um og jafnframt stærsta tabúið.  Einhvernveginn var ekki hægt að hugsa sér neinn annan í þessu hlutverki. 

Magnús Guðmundsson sýnir hér svo ekki verður villst að hann er hrífandi gamanleikari. 

Þétt og smart vel gerð sýning 

Vonandi að unnendur góðrar leiklistar láti ekki þessa sýningu framhjá sér fara.                                                                                                 Fréttablaðið 7 janúar 2008, Elísabet Brekkan 

Nútíma klassík!

 

Sveinn Ólafur Gunnarsson fer vel með hlutverk Eddies, hann er yfirmátar svalur og jafnframt ástríðufullur.

 

Magnús Guðmundsson er afar fínn í þessu hlutverki og sérlega fyndinn.

 

Óhætt að óska Jóni Gunnari og öðrum sem að sýningunni standa til hamingju!

 

Stutt og kraftmikið verk!

 

Verkið er unnið af heiðarleika, alúð og auðmýkt en það er atriði sem fleiri í sömu sporum mættu hafa að leiðarljósi.

 

Silfurtunglið fer vel af stað...                                                                        

sýningar

Miðasala á leikritið

Austurbær , Sími: 551 4700
midi.is

Dags.	Kl.	Leikrit	Staðsetning	Umsjón	Verð
04.01.08 - Föstudagur	20:00	Fool for love - 2.sýning	Salur 2	Austurbær	2.500 kr.
05.01.08 - Laugardagur	20:00	Fool for love - 3.sýning	Salur 2	Austurbær	2.500 kr.
11.01.08 - Föstudagur	20:00	Fool for love - 4.sýning	Salur 2	Austurbær	2.500 kr.
12.01.08 - Laugardagur	20:00	Fool for love - 5. sýning	Salur 2	Austurbær	2.500 kr.
19.01.08 - Laugardagur	20:00	Fool for love - 7. sýning	Salur 2	Austurbær	2.500 kr.
19.01.08 - Laugardagur	20:00	Fool for love - 6. sýning	Salur 2	Austurbær	2.500 kr.
19.01.08 - Laugardagur	22:00	Fool for love - 7. sýning	Salur 2	Austurbær	2.500 kr.
25.01.08 - Föstudagur	20:00	Fool for love - 8. sýning	Salur 2	Austurbær	2.500 kr.
26.01.08 - Laugardagur	20:00	Fool for love - 9. sýning	Salur 2	Austurbær	2.500 kr.

Miðasalan er opin frá kl. 13.00 - 17.00 

Fool for Love

Flókið samband fólks í Texas

Í ár dregur til tíðinda í íslensku leikhúslífi þar sem nýr atvinnuleikhópur sem kallast Silfurtunglið frumsýnir leikritið Fool for Love í Austurbæ.

Fool for Love er eftir bandaríska leikskáldið Sam Shepard og hefur einu sinni áður verið sett upp hér á landi undir titlinum Sjúk í ást. Verkið ber nú sinn upprunalega enska titil en er þó leikið á íslensku. Leikstjórinn Jón Gunnar Þórðarson segir erfitt að skilgreina verkið. „Það er eiginlega ómögulegt að kalla þetta verk eitthvað ákveðið eins og ástarsögu eða spennutrylli eða gamanleik þar sem þessir eiginleikar koma allir fyrir. Verkið er kannski einna athyglisverðast fyrir hversu oft það skiptir um tón. Við höldum okkur að mestu við upprunalegu leikgerðina en höfum þó bætt örlítið við. Til að mynda hefur Kristján Kristjánsson, KK, sem er bæði tónlistarstjóri sýningarinnar og fer með hlutverk í leikritinu, samið tónlist sérstaklega fyrir verkið."

Leikritið gerist í Texas-ríki í Bandaríkjunum árið 1978. Í því segir frá þeim May og Eddie sem eiga í flóknu sambandi sem einkennist af ást og ofbeldisfullum samskiptum. Auk KK eru leikarar í verkinu þau Sveinn Ólafur Gunnarsson, Þóra Karitas og Magnús Guðmundsson. „Andi áttunda áratugar síðustu aldar og andi bandaríska vestursins svífur yfir vötnum í þessu verki. Svo vel vill til að þessi andi passar einmitt stórvel inn í sýningarrýmið á efri hæð Austurbæjar þar sem við sýnum, en þar var á áttunda áratugnum skemmtistaðurinn Silfurtunglið, sem leikhópurinn dregur nafn sitt af.

Innréttingarnar í húsinu kallast fullkomlega á við stemninguna í verkinu og því má segja að leikhúsreynslan hefjist um leið og gestir stíga inn úr dyrunum. Við höfum aukið enn á áhrifin með því að opna vestra-bar í anddyrinu og því er tilvalið fyrir gesti að fá sér einn drykk fyrir sýninguna og upplifa hughrifin sem húsnæðinu fylgja," segir Jón.
Uppsetningin er fyrsta verkefni leikhópsins Silfurtunglið sem hyggur þó á frekari landvinninga í framtíðinni. Kjarni hópsins er nýútskrifað leikhúsfólk, en hópurinn var fljótur að vinda upp á sig. „Silfurtunglið telur nú um tuttugu manns sem starfa á ólíkum sviðum innan leikhússins, bæði leikarar, tónlistarmenn, myndlistarmenn, hönnuðir og svo mætti lengi telja. Í íslensku leikhúslífi þarf maður einfaldlega að skapa sér sín eigin tækifæri og þess vegna varð Silfurtunglið til," segir Jón.

Leikritið Fool for Love verður sýnt í Austurbæ út janúar. Miða má nálgast í miðasölu Austurbæjar og á vefnum www.midi.is og kostar miðinn 2.500 kr.